mánudagur, 19. september 2011

38. Enn úr Fjölsmiðjunni

Þegar ég sótti gluggana mína til Akureyrar í vikunni leit ég við í Fjölsmiðjunni og ætlaði svona sérstaklega að leita eftir snögum. Fann einn.
Mikið var til af reglulega fallegum diskum. Tók þarna bara fjóra núna. Mig vantar líklega ekkert diska. Þeir þurfa skápapláss greyin. Alltaf brúk fyrir tágakörfur undir handverk eða mosaskreytingar til dæmis. Svo þarf að nota að minnsta kosti tvær möppur á ári og gerir ekkert til þó að einhver annar hafi notað þær áður. Og svo eru þarna tveir fyrirtaks baukar. Þarf ég þá? Tjaaa. Mig minnir að ég hafi greitt 1700 krónur fyrir þennan farm. Ég leit núna inn í deild sem ég hef ekki tekið eftir þarna fyrr en það er bóka og blaðadeildin. Skoða það betur seinna, slíkt tekur tíma. Nú voru þarna líka þónokkur túbusjónvörp og nokkrar körfur fullar af fjarstýringum!

fimmtudagur, 15. september 2011

37. Pinnastóllinn

Setjum hér smá tilbreytingu við alla baukana.
Mamma er dugleg að gera upp gömul húsgögn.
Hún gaf mér / okkur þennan stól í afmælis / brúðar gjöf hérna um árið. Það er bráðabirgðaáklæði á setunni og ekki gott að segja hvenær ég kem því í verk að vefa eða sauma út í viðeigandi setu. Stóllinn er samt fínn.

laugardagur, 10. september 2011

36. Lyftum oss á kreik

Ég verð alltaf fyrir einhverjum töfum við endurskipulagningu baukasafnsins en hér er mynd sem ég tók um daginn af lyftiduftsdeildinni. Ef þið labbið um og haldið að þarna séu sumir baukar eins þá er það mesti misskilningur, það munar stundum á texta og svo eru sumir strikamerktir og aðrir ekki.
Nú skríðum við í fimmþúsund innlit á þessu bloggi.