46. Jólabaukar

Nú er jólabaukadeildin búin að fá samastað í tilverunni. Nánar tiltekið efst uppi á vegg í svefnherberginu þannig að nú getur eiginmaðurinn haft jól fyrir augunum allt árið um kring. Hann saknar þess alltaf þegar ég tek niður skrautið sem ég hengi yfir rúminu.

Þarna nota ég kassalengjurnar sem afgangs urðu HÉRNA

og þá kemur þetta svona út.

Eins og sjá má eru það 24 baukar sem flokkast sem jóla. Sumir eru á gráu svæði þannig að kannski skipti ég þeim út ef nauðsynlegt reynist að bæta einhverjum við þarna en mig vantar í sjálfu sér ekki bauka sko. Ég tek skýrt fram að fólk á ekki að fara og kaupa "einhvern" bauk handa mér. Mér finnst hins vegar ferlega gaman að eignast gamlan flottan bauk og í ljósi fyrirferðar eru þeir oftast nær því betri sem þeir eru minni.

Ég segi líklega frá því einhvern tíma hvað þeir eru margir heima hjá mér nú um stundir, það er langt síðan ég taldi síðast svo að ég veit ekki vel hvað þeir eru mörg hundruð. Nú eru væntanlega 52 baukar í svefnherberginu til dæmis :) . Þessi bakgrunnsmynd er tekin þar inni og þrír eru á KÓKKASSANUM á veggnum.

41. Rúgbrauðskassinn

Hér er færsla úr gamla blogginu mínu. Ákvað að afrita hana frekar en að vísa á hana af því að ég neyðist til að hafa það læst til að hindra ruslathugasemdir sem mokast inn á flestar blogcentralsíður nú um stundir. Lykilorðið þar er talan og er allsekki leyndarmál.

19.12.2008 09:24:21 / tumsa

356. Rúgbrauðskassinn

Ég sá um daginn rúgbrauðskassa í Frúnni í Hamborg, keypti hann ekki en dauðsá fljótlega eftir því. Í gærkvöldi brunaði ég svo til Akureyrar að sækja danina mína, þ.e. barnið mitt og tengdabarnið, og þá byrjaði ég á að fara í Frúna með slatta af dótinu sem ekki gekk út í portinu um daginn og bjóða það þar til kaups. Það gekk eftir að hluta, ég losnaði við sumt, borgaði 2000 kall á milli og fór út alsæl með kassann góða. Fór svo til mömmu minnar og hafði út úr henni svolítið af spýtum úr gamla Holtakotabænum þar sem hún fæddist, en þær ætla ég að hafa sem hillur í kassanum sem þar með verður eitt fínasta húsgagnið á bráðum nýmáluðum stofuvegg. Myndir birtast þegar þar að kemur. 

Þetta var sem sagt í desember 2008 svo sem sjá má, en hér eru nýlegar myndir sem hæfa betur dótabloggi en þær sem ég setti um árið á hvunndagsbloggið þegar ég átti ekkert dótablogg.

Sumt af því sem í kassanum er hefur nú þegar fengið umfjöllun hér, sumt kemur kannski seinna.

Í tilefni dagsins skipti ég um bakgrunn.

Uppfært: Hehe maður er stundum svo sljór. Það var ekki fyrr en núna að ég áttaði mig á að það vantaði einn bauk í lyftiduftsbaukadeildina þegar ég myndaði hana um daginn og birti  hér í færslu númer 36.

33. Stofubaukar

Það er alltaf vont þegar ung manneskja fellur frá. Í þetta sinn var það maður sem ég þekkti eingöngu í gegn um blogg en hann var einn fárra íslenskra dótabloggara. Nú bætist líklega ekki við bloggið á rúi og stúi.

Loksins er ég búin að koma upp hillunni í stofunni. Í síðustu færslu sýndi ég ykkur parta úr verslunarinnréttingu. Ég sagaði sundur og skeytti saman og úr því varð þetta.

Í hólfunum eru baukar undan kakói, kaffi og sælgæti, aðallega súkkulaði. Já ég veit, það hefði passað betur að halda sig við drykki og hafa tebauka í stað sælgætisins, en tebaukar eru yfirleitt svo litlir að þeir hefðu ekki farið vel í þetta stórum hólfum. Ofan á eru svo sælgætisbaukar ásamt örfáum undan kexi. Þetta er 41 baukur.

Baukarnir í eldhúsinu voru orðnir allt of margir, skítugir og í óreiðu og þarna á stofuveggnum var hentugasta plássið fyrir svona hillu. Þegar ég var með dyggri aðstoð Ingimundar búin að festa hana upp sýndi ég manninum og spurði undirleit hvort þetta væri alveg galið, þá svaraði hann umburðarlyndur eins og oftast: Hér inni er hvort sem er flest galið.

Nú liggur sem sagt fyrir að þrífa og endurraða restinni og mér þykir sennilegt að það þurfi að blogga um það af og til. Ég er að finna út úr þessari nýju tölvu minni smátt og smátt.

Horfum svo bara á Landann annað kvöld, það verður fróðlegt að sjá hvernig þeir veiða bestu partana úr öllum upptökunum frá í fyrradag.

32. Flóamarkaður

 Fór nýlega í kaupstaðinn og varð þá fyrir því happi að komast í tæri við verslunarinnréttingu sem átti að henda. Þetta er hluti þess sem ég kom í bílinn:

Þetta er komið í ýmislegt brúk en enn er eftir að útfæra ýmis not.
Á heimleiðinni kom ég því loks í verk að heimsækja flóamarkaðinn að Dæli í Fnjóskadal. Það var skemmtilegt. Þar hitti ég meðal annars þennan fína bauk:

Ég bauð part af innréttingunni í býtti og gengið var að tilboðinu og allir glaðir.
Nú er borðtölvan mín óstarfhæf með öllu og ég er í fyrsta sinn á æfinni að blogga á fartölvu og þetta gengur svona og svona en trúlega má venjast þessu eins og öðru.

22. Kókkassi

 Ég er hrifin af kössum. Mest hrifin af gömlum trékössum. Þá skal festa upp á vegg. Hér er gamall kassi undan kóki í gleri og hver flaska átti sér sitt hólf. Kassinn er uppi á svefnherbergisvegg. Ég er aftur á móti ekkert hrifin af kóki.

Rauða málningin utan á er að verða minningin ein.